Friday, April 18, 2008

لكل الصيادله : عاوزين تشتغلوا ايه ؟

بسم الله الرحمن الرحيم

باذن الله هتكلم معاكم النهارده يا جماعه في مجالات شغل الصيدله عموما

وانا مجمعلكم المعلومات دي من كذا مكان ويارب تكون مفيده للكل عشان كل واحد يحدد هوا عاوز يشتغل ايه ، ويبتدي علي اساس قراره ياخد كورسات وينمي بعض المهارات المهمه عنده

بتحب التعامل مع الناس ؟

بتحب تصرف الادوية ؟

بتحب الراحة وعدم الاجهاد البدني والعصبي والنفسي ؟

لو انت ده كله يبقي متترددش عشان انسب مكان ليك انك تفتح صيدليه او تشتغل في اي صيدليه ، ودي يمكن من اكتر الشغلانات المريحه في جميع المجالات خصوصا وانك بتبقى قاعد في مكانك معزز مكرم والتكيف والدش شغالين 24 ساعه !

-------------------------------------------------

بتحب الشغل العملي والعينات وال titration وال samples ؟
بتحب تبعد عن الدووشه والضغط العصبي ؟
مبتحبش تتعامل كتير مع الناس ؟
بتحب الالتزام بمواعيد ثابته للشغل ؟
يبقى مكانك الطبيعي مصانع الادويه !

او بتحب الحركة والابتكار وعدم الروتين في الشغل وان الواحد ليه تارجت معين لازم يعمله والسفر وحضور المؤتمرات وبرضه اللف على الدكاترة وانك تستحملي رزالة الممرضين والصيادلة اللي بتسأليهم على ال feedback وممكن يبقى فيه رزالة من ال supervisor وده طبعا في الدعاية !

يزيد على كده الشغل في صيدليات المستشفيات او معامل التحاليل (بعد الدبلومة)

وكمان ال clinical pharmacy

في معهد الأورام بينقسم الشغل لحاجتين الأوليinpatient pharmacy وهنا بيكون دور الصيدلي في التعامل مع المرضي المحجوزين في المستشفي اللي هما اصلا مصابين بالcancer,طبعا احنا عرفين ان الchemotherapy اللي بيتعالجو بيها بتقلل المناعه جدا وبيكونو عرضه لأيinfection دايما,هنا دورك بيكون اختيار الcombination من الأantibioticالمناسبه للحاله وكمان تحديد الجرعات المطلوبه,بتعمل roundيومي علي الحالات المحجوزه وبتابع الجرعات من الchemoوالantibiotic.أما بخصوص الoutpatient pharmacy فهنا بيكون التعامل مع الناس اللي بتيجي علي ميعاد جرعة الchemo بتاعتو ,بتحدد حسب تشخيص الطبيب الchemo المناسب للحاله والجرعه المطلوبه(طبعا كل ده بيكون ماشي علي بروتوكولات معروفه وثابته يعني مش اختراعات يعني)علي فكره هي شغلانه حلوه وفبها challengeحلو اوي لكن محتاجه شغل ومذاكره جامدين.

شغل المراكز البحثية اللى هما زى الهيئة القومية للرقابة والبحوث الدوائية او ال vacsera وده على حسب تدريبة لفترة هناك

الاماكن دى فيها اقسام كتير بس اللى انا اتدربت فيه وشفته الاقسام التالية


بالنسبة لقسم الBIOLOGY ده بيكون زى شغل ال PHARMACOLOGY يعنى بمعنى انى بيجلى دوا بحقنه على فران او ارانب يعنى على حسب الدوا اللى انا هجربه وزى ما متحددلى وهشوف تأثير الدوا ده عليهم واقدر منه اشوف هل الدوا فعال ولا نو وبالتالى اذا كنت هوافق على الدوا ولا هيترفض

اما قسم ال Q.C (HPLC ) فده بيكون مرتبط بردو بقسم الBIOLOGY يعنى بمعنى انه بعد ما جربت الدوا على الفران دى
باخد الدوا واطلع بيه على قسم ال HPLC واعمله ال ANALYSIS المطلوبة وبردو ده حسب ما بيكون متحددلى طريقة التحليل الدوائى
وانا بشوف هل الطريقة اللى الشركة بتاعه الدوا دى قالتها هل فعلا مناسبة ولا لأ و اذا كنت انا هعمل علي الطريقة دى اضافات عشان النتيجة تطلع مضبوطة
و بعد كل ده هشوف بقى اذا كانت العينة دى او التشغيلة سليمة ولا لأ
يعنى هل اعطى الموافقة على الدوا انه ينزل السوق ولا هرفضه وارجعه للشركة تانى

اما اخيرا قسم ال CEUTICS فانا هنا بردو بتجيلى عينات من الادوية وهى غالبا ال TAB وال CAP
وبشوف ال DISSLOUTION وال DISINTEGRATION و ال THICKNESS والحاجات دى كلها بتاعه ال CEUTICS
وبردو بشوف هل النتايج اللى طلعتها تنطبق اللى النتايج اللى الشكة بعتاها ولا نو
وعليه بقرر اذا كنت هعطى موافقة على الدوا ده ولا لأ
غير ان هنا كمان فى القسم ده بيشوفوا الشكل النهائى للمستحضر
يعنى زى مثلا التغليف ,اللون , علبة الدوا واللى مكتوب عليها هل شكله مناسب ولا لأ , هل رقم التشغيلة مكتوب ولا لأ , تاريخ الصلاحية والحاجات دى كلها عشان اعرف اعطى للدوا قيمة لانهم بيكون عندهم شيت لكل دوا يقيموه فيها

دي كانت معلومات بسيطه عن شغل الصيادله في مصر خصوصا

والشغل عموما رزق واللي مكتوبلك تشتغله هتشتغله باذن الله ، بس اهم حاجه نعمل بالاسباب ونشوف ايه اللي ناقصنا من مهارات ونكمله

بالتوفيق باذن الله :)
BIOLOGY , Q.C (HPLC ) , CEUTICS

2 comments:

mostafa rayan said...

كلام جميل
رغم اني مش صيدلة

بنت مصريه said...

ما شاء الله عليك جبت الحجات دى منين مع انى مش خريجه صيدله بس اعرف ناس صيدله وهقولهم عالمعلومات الجميله دى